«Ժողովրդավարությունը դրա համար է»․ Փաշինյանը՝ թռուցիկն իր վրա նետած աղջկան
Վարչապետ Նիկոլ Փաշինյանի մասնակցությամբ սահմանադրական հանրաքվեի «Այո»-ի քարոզարշավի ժամանակ միջադեպ է եղել քաղաքացիներից մեկի հետ։
Փաշինյանը քարոզարշավ էր անցկացնում Երևանի մետրոյում՝ անձնագրին նմանեցված «Այո»-ի թռուցիկներ բաժանելով։ Երբ հերթական թռուցիկն է տվել երիտասարդ աղջիկներից մեկին, վերջինս ճղել է այն ու կտորները նետել վարչապետի վրա։
Վերջինս դրան արձագանքել է` ասելով, որ «ժողովրդավարությունը դրա համար է», ու շարունակել քարոզարշավը։
Ավելի ուշ Փաշինյանն անդրադարձել է միջադեպին ֆեյսբուքյան իր էջում։
«Նա (աղջիկը՝ խմբ․) Հայաստանի Հանրապետության Հպարտ քաղաքացի է։ Եվ ես` որպես Հայաստանի Հանրապետության վարչապետ, իմ պարտքն եմ համարում ապահովել նրա իրավունքների լիարժեք իրացումը», - գրել է նա։
Սահմանադրական հանրաքվեն կայանալու է ապրիլի 5-ին։
