Apple-ն ու Google-ն աշխատում են կորոնավիրուսի պանդեմիային հետևելու համակարգի վրա՝ այն գործելու է իրենց սմարթֆոններում Bluetooth-ի հիման վրա։

Ընկերությունները հայտարարել են կորոնավիրուսային վարակի տարածումը կանխող համատեղ նախաձեռնության մեկնարկի մասին՝ դա Android-ի և iOS-ի համար նախատեսված միասնական համակարգ է։ Այն գրանցվելու է Bluetooth-ի միջոցով, եթե 2 սմարթֆոն իրարից բավականին մոտ են հայտնվել, և հիշելու է այդ կոնտակտները, գրում է DTF-ը։

Եթե օգտատերերից մեկը հայտնի, որ իր մոտ Covid-19 է հայտնաբերվել, ապա այդ մասին կզգուշացվեն բոլոր նրանք, ովքեր կարող էին նրանից վարակվել։

Անձնական տեղեկությունների արտահոսքը նվազագույնի հասցնելու համար սարքերը միայն անանուն «բանալիներ» կփոխանակեն, որոնք փոխվում են յուրաքանչյուր 15 րոպեն մեկ։ Տվյալների բազայում կպահպանվեն միայն այն «բանալիները», որոնց միջև շփում է եղել։ Ընդ որում, օգտատերերը պետք է համաձայնություն տան, որպեսզի նման փոխազդեցությունները վերահսկվեն։