Տոկիոյի Օլիմպիական խաղերի կազմկոմիտեի ղեկավար Եսիրո Մորին հայտարարել է, որ հնարավոր է հետաձգված «Տոկիո 2020»-ը 2021 թվականին ևս չկայանա, եթե կորոնավիրուսի պանդեմիան շարունակի սպառնալիք լինել, փոխանցում է «Ինտերֆաքսը»։

Հարցին՝ հնարավոր է արդյոք, որ Օլիմպիական խաղերը հետաձգվեն ևս մեկ տարով և անցկացվեն 2022-ին, Մորին հայտարարել է, որ նման դեպքում խաղերը կարող են չեղարկվել։

Նա հիշեցրել է, որ Օլիմպիական խաղերը նախկինում միայն պատերազմների պատճառով են հետաձգվել։ Այդ կոնտեքստում նա նշել է, որ այժմ ընթանում է պատերազմ «անտեսանելի թշնամու դեմ»։

Միաժամանակ, Մորին նշել է, որ եթե կորոնավիրուսի պանդեմիայից հետո իրավիճակը հաջողվի վերահսկողության տակ պահել, «Օլիմպիական խաղերը հանգիստ կարող են անցկացվել 2021-ին»։

Օլիմպիական խաղերը նախատեսվում էր անցկացնել 2020-ին, սակայն կորոնավիրուսի պանդեմիայի պատճառով այն հետաձգվեց մինչև 2021 թվականը։ Ապրիլի 28-ի դրությամբ աշխարհում 3 մլն-ից ավելի մարդու մոտ կորոնավիրուս է հաստատվել, 200,000-ից ավելի մարդ մահացել է։