Մեդալի հավակնորդ շրջանավարտները քննություն կհանձնեն միայն մաթեմատիկա առարկայից, տեղեկացնում է կրթության, գիտության, մշակույթի և սպորտի նախարարությունը։
Քննությունը կանցկացվի հունիսի 25-ին՝ պահպանելով սանիտարական համապատասխան նորմերը։ Կմասնակցի մոտ 100 հավակնորդ՝ Երևանից և ՀՀ բոլոր մարզերից։
Քննությունը բարեհաջող հաղթահարելու դեպքում հավակնորդները կստանան մեդալ, իսկ եթե դիմորդ են, ապա հավասար միավորների դեպքում նաև բուհեր ընդունվելու առավելություն կունենան։
Եթե սովորողը «մաթեմատիկա» առարկան ընտրել է որպես միասնական քննություն, ապա գերազանցության մեդալ տրամադրելիս հիմք է ընդունվում միասնական քննության արդյունքը:
Ավելի վաղ հայտնի դարձավ, որ դպրոցներում փոխադրման և ավարտական քննություններ չեն անցկացվի, աշակերտները տարեվերջյան գնահատականներ կստանան։ Դիմորդները միայն մեկ հիմնական քննություն կհանձնեն։ Միասնական քննությունների մասնակցելու հայտեր կարելի է ուղարկել մայիսի 15-ից հունիսի 15-ը՝ ընտրելով քննական առարկան։
Հաշվի առնելով կորոնավիրուսի կանխարգելման անհրաժեշտությունը՝ հանրակրթական դպրոցներում ուսումնական գործընթացն առցանց է ընթանում, ԿԳՄՍ նախարարությունը գործարկել է հեռավար կրթության հարթակ: Հայաստանի ուսհաստատությունները փակ են մարտի 13-ից: