Հայաստանի Ազգային անվտանգության խորհրդի քարտուղար Արթուր Բաղդասարյանը հունվարի 15-ին ընդունել է Եվրոպայի Խորհրդի Խորհրդարանական Վեհաժողովի (ԵԽ ԽՎ) մոնիթորինգի հանձնաժողովի համազեկուցողներ Ջոն Պրեսկոտին եւ Ժորժ Կոլոմբիեին, հանձնաժողովի քարտուղար Բաս Քլայնին: Զրուցակիցները քննարկել են ԵԽ ԽՎ 1609 եւ 1620 բանաձեւերի կատարմանը վերաբերող հարցեր: Ա. Բաղդասարյանը նշել է, որ 1609 եւ 1620 բանաձեւերի կատարման ուղղությամբ էական աջընթաց է գրանցվել: Հայաստանը որդեգրել է բարեփոխումների ուղին: Հայաստանի իշխանությունների նպատակն այդ բարեփոխումները խորացնելն է: ԵԽ ԽՎ հունվարյան նստաշրջանին Հայաստանի նկատմամբ պատժամիջոցների կիրառումը կարող է երկիրը դուրս հանել բարեփոխումների ուղուց, ուստի ԵԽ ԽՎ-ից ավելի հավասարակշռված դիրքորոշում է ակնկալվում: Մասնավորապես` անհրաժեշտ է բարեփոխումների կոնկրետ առաջարկներ ձեւակերպել` դրանց կատարման համար կոնկրետ ժամկետներ մատնանշելով: