Սլովենիայի կառավարությունը պաշտոնապես հայտարարել է, որ երկրում կորոնավիրուսի համաճարակն ավարտվել է։ Մարտի 12-ից երկրում գործող համաճարակի ռեժիմը մայիսի 15-ից չեղարկվել է։
«Հանրային առողջապահության ազգային ինստիտուտի գնահատականներով, բոլոր ցուցանիշները մատնանշում են բնակչության շրջանում կորոնավիրուսի համաճարակի հետ կապված վիճակի կայունացում»,- ասվում է կառավարության հաղորդագրության մեջ, գրում է ՌԲԿ-ն։
Սակայն խոսքը ոչ թե բոլոր կարանտինային միջոցների, այլ դրանց մի մասի չեղարկման մասին է։ Երկրում նախկինի պես արգելված են զանգվածային միջոցառումները, պահպանվում է սոցիալական հեռավորության պահանջն ու սանիտարահիգիենիկ նորմերի պահպանումը։
Սակայն շուտով կբացվեն սահմանային անցակետերը։ ԵՄ քաղաքացիները կկարողանան Սլովենիա մուտք գործել առանց 14-օրյա կարանտինի խստիվ պահպանման, եթե նախորդ 2 շաբաթում չեն լքել ԵՄ տարածքը և չունեն վարակման ախտանիշներ։
ԵՄ մաս չկազմող երկրների քաղաքացիների համար 14-օրյա կարանտին է նախատեսված, բացառությամբ դիվանագիտական այցերի և հուղարկավորությանը մասնակցելու նպատակով։
Սլովենիայում կորոնավիրուսով վարակի առաջին դեպքը գրանցվել է մարտի 4-ին, ընդհանուր առմամբ երկրում գրանցվել է վարակի 1464 դեպք, 103 հիվանդ մահացել է։