ՌԴ ԱԳ նախարար Սերգեյ Լավրովն ու Ադրբեջանի ԱԳ նախարար Էլմար Մամեդյարովը մայիսի 19-ին հեռախոսազրույցի ընթացքում կարծիքներ են փոխանակել ղարաբաղյան հակամարտության կարգավորման շուրջ։
Մասնավորապես, Մամեդյարովը տեղեկացրել է պաշտոնակցին ԵԱՀԿ ՄԽ համանախագահների հետ վերջին տեսակոնֆերանսի մասին, գրում է Interfax.az-ը։
Նախարարներն անդրադարձել են նաև Դաղստանում կուտակված Ադրբեջանի քաղաքացիների տարհանման հետ կապված իրավիճակին։
Քննարկվել են նաև ռազմավարական գործակցության հարցեր, ասվում է հաղորդագրության մեջ։
Հայաստանի ԱԳ նախարար Զոհրաբ Մնացականյանը և ԵԱՀԿ Մինսկի խմբի համանախագահները մայիսի 19-ին տեսակոնֆերանսի ժամանակ քննարկել են նախարարական մակարդակով հանդիպումների անցկացման հեռանկարները։
Մայիսի 18-ին տեսակոնֆերանսի ձևաչափով տեղի էր ունեցել համանախագահների հանդիպումն Մամեդյարովի հետ։ Կողմերը քննարկել էին ընթացիկ վիճակը ղարաբաղյան հակամարտության կարգավորման գործընթացում և քայլերը, որ ձեռնարկվելու են այդ ուղղությամբ պանդեմիայից հետո առաջիկա ամիսներին։