ՀՀ-ում հիվանդանոցները շատ ծանրաբեռնված են, հնարավոր է՝ տեղի խնդիր առաջանա, բայց այս պահին փորձ է արվում ծավալումներով այդ հարցը փակել, PanARMENIAN.Net-ին ասաց առողջապահության նախարարի խոսնակ Ալինա Նիկողոսյանը։

Նա նշեց, որ չունի ինֆորմացիա ՌԴ-ի կամ Վրաստանի օգնությանը դիմելու մասին։

Հարցին, թե վերջին օրերին կորոնավիրուսից առողջացածների թիվը փոքր է, իսկ վարակվածներինը՝ 14 օր առաջվա տվյալներով հարյուրների է հասել՝ Նիկողոսյանը նշեց, որ վարակը հաղթահարածների թիվը փոքր է, քանի որ համակարգային փոփոխություն է եղել։

«Մայիսի 22-ից այդ մարդիկ մտել են համակարգ՝ տնային բուժման տակ, դեռ 14 օրը չի լրացել, եթե հաշվում ենք մայիսի 22-ից մինչ օրս։ Պոլիկլինիկաների բժիշկները պետք է հետևեն այդ ընթացքին, 14-րդ օրը համակարգում կատարեն այդ փոփոխությունը։ Ըստ այդմ, նրանք դառնում են առողջացած», - ասաց նա։

Հունիսի 4-ի դրությամբ ՀՀ-ում կորոնավիրուսով վարակվածների թիվն ավելացել է ռեկորդային՝ 697 դեպքով, վարակակիրների ընդհանուր թիվը 11,221 է։ Կորոնավիրուսից մահվան դեպքերի թիվն ընդհանուր առմամաբ 176 է, այլ պատճառով՝ 68։ Առողջացածների ընդհանուր թիվը 3468 է։