ԱՄՆ նախագահ Դոնալդ Թրամփը կարգադրություն է ստորագրել, որով մինչև 2020-ի ավարտը դադարեցվում է մի շարք մուտքի արտոնագրերի տրամադրումը։ Խոսքը H1-B, H-4 և H-2B, L տեսակի աշխատանքային վիզաների և գրին քարտի մասին է, գրում է ՏԱՍՍ-ը։
Տեքստում նշվում է, որ ԱՄՆ նախագահը դիմում է այդ միջոցին, որպեսզի ամերիկացի բանվորներն առաջինը կորոնավիրուսի տնտեսական հետևանքներից վերականգնվելու հնարավորություն ստանան։
Սահմանափակման տևողությունը դեկտեմբերի 31-ից հետո կարող է կրկին երկարացվել։
H-1B տիպի մուտքի արտոնագրերը թույլ են տալիս ամերիկացի գործատուներին ժամանակավոր հիմունքով արտասահմանցի աշխատակիցների վարձել։ Թրամփի վարչակազմը մինչ համաճարակն արդեն փորձում էր խստացնել այդ վիզաների տրամադրման կարգը։
H-4 վիզաները տրամադրվում են H-1B արտոնագրեր ունեցողների մերձավոր հարազատներին։ Իսկ H-2 վիզաները թույլ են տալիս ժամանակավոր աշխատուժ վարձել գյուղոլորտում, շինարարության և այլ ոլորտներում։