Հուլիսի 9-ին Անձնական տվյալների պաշտպանության գործակալության ֆեյսբուքյան էջում անձնական տվյալների պաշտպանության մասին մատչելի օրինակներով ուղեցույց կհրապարակվի։ Այդ մասին հայտարարել է գործակալության պետ Գևորգ Հայրապետյանը։
Նա զգուշացրել է, որ կասկածելի կամ անծանոթից նամակ ստանալու դեպքում պետք չէ անցնել դրանում նշված հղումներով, գրում է Shantnews.am-ը։
Հայրապետյանը նշել է, որ հնարավոր է նաև նամակներ գան ծանոթների անունից՝ 1 տառի կամ սիմվոլի տարբերությամբ: Դրանք կարող են ստացվել հատկապես տարբեր բանկերի, կազմակերպությունների անունից:
Նա նաև հորդորել է գաղտնաբառ ընտրելիս օգտագործել սիմվոլների, տառերի, թվերի համադրություն և չօգտագործել նույն գաղտնաբառը մեկից ավելի հարթակում։
Ըստ մասնագետի՝ գործակալությունը պատրաստակամ է օգնել և անհատների, և կազմակերպությունների:
Վերջին շրջանում համացանցում կորոնավիրուսից մահացած և կոնտակտավոր անձանց անձնական տվյալներ են հայտնվել, նաև ադրբեջանցիները բազմաթիվ հայաստանյան փաստաթղթեր են հրապարակել համացանցում` անձնագրեր, բանակային փաստաթղթեր։