Տավուշի ուղղությամբ մարտերի ընթացքում մահացել է 1996 թվականին ծնված զինծառայող Իսմայիլով Նազիմ Աֆղան օղլուն, որը Աղստաֆայի շրջանի Քոլխալֆալի գյուղից էր։ Գյուղապետը հաստատել է համագյուղացու մահվան լուրը։ Այս մասին սոցցանցերում գրում է ադրբեջանական ընդդիմադիր «Մեյդան» լրատվականի խմբագիր Հեբիբ Աբդուլլաևը։

Զինծառայողի մահվան մասին պաշտոնապես չի հայտարարվել, թեև հուլիսի 16-ի առավոտյան Ադրբեջանի ՊՆ խոսնակը BBC-ի հետ զրույցում հաստատել է, որ ադրբեջանական կողմն ունի զոհեր և խոստացել է ավելի ուշ հայտնել մանրամասներ։

Razm.info-ն գրում է, որ ադրբեջանական սոցցանցերի ուսումնասիրությունից հայտնի է, որ Իսմայիլով Նազիմ Աֆղան օղլուն պայմանագրային զինծառայող է և սպանվել է հուլիսի 15-ի լույս 16-ի գիշերը՝ մարտերի ընթացքում։

Ժամը 17:35-ին Ադրբեջանի պաշտպանության նախարարությունը հաստատել է զինծառայողի սպանվելու մասին տեղեկությունը։

Հայկական կողմը հայտարարել է, որ հուլիսի 16-ի գիշերը ադրբեջանական կողմը խախտել է հրադադարի պայմանավորվածությունը և 100-հոգանոց դիվերսիայի փորձ է արել՝ հայկական «Անվախ» դիրքի ուղղությամբ։ Հակառակորդը հետ է շպրտվել, հայկական կողմը զոհեր և վիրավորներ չունի։

Հուլիսի 12-ից հայ-ադրբեջանական սահմանին ռազմական գործողություններ են ընթանում, որոնք հրահրել է Ադրբեջանը: Բոլոր հրետակոծությունները թիրախավորվում են ՀՀ ԶՈւ կրակով և լռեցվում: Հայկական կողմը 4 զոհ ունի։ Ադրբեջանը պաշտոնապես 11 զոհի մասին է հայտնել: Ադրբեջանական ԶՈւ-ն նաև հրետակոծել է Չինարին, Այգեպարը, Ներքին Կարմիրաղբյուրը, Մովսես և Տավուշ գյուղերը, Բերդ քաղաքը: Հուլիսի 15-ին սահամնային իրավիճակը համեմատաբար հանգիստ էր։