Կորոնավիրուսով վարակվածները դրա դեմ իմունիտետ են ունենում վարակվելուց հետո նվազագույնը 6 ամսվա ընթացքում, հայտարարել է Շվեդիայի հանրային առողջապահության գործակալությունը, փոխանցում է Forbes-ը։

Շվեդիայի գլխավոր համաճարակաբան Անդրես Թեգնելայի պնդմամբ՝ կորոնավիրուսով վարակված բոլոր անձինք ունեն իմունիտետ՝ անկախ նրանից, նրանց մոտ հակամարմիններ ձևավորվել են, թե՝ ոչ։

Ըստ միջազգային հետազոտության՝ կորոնավիրուսի հակամարմինները մարդու մոտ կարող են վերանալ մի քանի ամսում, հատկապես նրանց, ովքեր վարակը թեթև են տարել։ Փորձին մասնակցածների 14%-ը երկու անգամ հակամարմինների ստուգում է անցել, առաջին անգամ դրանք հայտնաբերվել են, երկրորդ՝ ոչ։

Շվեդիան եվրոպական այն երկրներից է, որը վարակի դեմ որևէ հատուկ և խիստ միջոցառում չի իրականացրել։ Կորոնավիրուսի դեմ պայքարի շվեդական մեթոդը հիմնվում էր կոլեկտիվ իմունիտետի զարգացման վրա։ Հուլիսի կեսին, սակայն, երկրի գլխավոր համաճարակաբանը խոստովանել էր, որ զարմանալիորեն դանդաղ է ձևավորվում կոլեկտիվ իմունիտետ։ Շվեդիայում, Ջոնս Հոփքինսի ինստիտուտի տվյալներով, հուլիսի 22-ին վարակակիրների թիվն անցել է 78,000-ը, մահացել է 5646 մարդ։