Զինծառայողների ապահովագրության հիմնադրամը նպատակ ունի փոխհատուցել 1998-2002 թվականներին զոհվածների ընտանիքներին։ Այս մասին Yerkir Media-ին հայտնել է հիմնադրամի տնօրեն Վարուժան Ավետիքյանը։
Նրա խոսքով՝ այս կապակցությամբ կայացվել է ռազմավարական որոշում՝ մոտ ապագայում կսկսվեն նաև այդ հատուցումները։
Տավուշյան բախումների ֆոնին կտրուկ աճել է հիմնադրամին արվող նվիրատվությունների թիվը․ հուլիսի 17-ից 21-ը նվիրաբերվել է 160,728,000 դրամ։
Զինծառայողների ապահովագրության հիմնադրամը («1000 դրամի» հիմնադրամը) սկսել է գործել 2017-ի հունվարից։
Այն նախատեսված է ՀՀ պաշտպանությանը և մարտական գործողություններին մասնակցելիս զոհված կամ հաշմանդամ դարձած զինծառայողների, ինչպես նաև կամավորների ընտանիքներին միանվագ և ամսական գումարներ վճարելու համար: Հիմնադրամի միջոցները գոյանում են գրանցված աշխատողների աշխատավարձերից գանձվող 1000 դրամների և նվիրատվությունների հաշվին։
Թեև հիմնադրամի հատուցումներն ի սկզբանե տարածվում էին 2017-ից եղած դեպքերի վրա, դրա միջոցների աճին զուգահեռ որոշում էր կայացվել վճարել նաև 2008-ից 2017 թվականին զոհվածների և զինհաշմանդամ դարձածների ընտանիքներին։