ՌԴ-ում ոստիկանությունը Մոսկվայում ևս 9 անձի է ձերբակալել, ովքեր մասնակցել են քաղաքում հայ-ադրբեջանական բախումներին, փոխանցում է ՏԱՍՍ-ը։

«Ոստիկաններն անօրինական գործողություններ կատարելու կասկածանքով ձերբակալել են 9 մարդու։ Հուլիսի 24-ին Մոսկվայի տարածքում քաղաքացիների միջև կոնֆլիկտային իրավիճակ է ստեղծվել։ Մասնավորապես, մի տղամարդ մարմնական վնասվածք է ստացել, վնասվել է խանութի ապակին։ Մեկ այլ միջադեպի ժամանակ անհայտ անձինք կոտրել են ՓԲԸ-ի սրճարանի և ավտոլվացման կետի ապակիները, ինչի արդյունքում ապակու բեկորներից մի այցելու վնասվածք է ստացել»,- հայտնել են ոստիկանությունից՝ հավելելով, որ քրգործեր կան հարուցված խուլիգանության հոդվածով։

Մոսկվայի ոստիկանությունից, հայտնել են նաև, որ իրակականցվում են քննչական գործողություններ՝ դեպքի հանգամանքերը պարզելու և կասկածյալների ձերբակալելու ուղղությամբ։ Ոստիկաններն ընդգծել են, որ ճնշվելու է հասարակական կարգի ցանկացած խախտում և հիշեցրել, որ համաձայն ՌԴ միգրացիոն օրենքների օտարերկրացիների համար երկիր մուտքը կարող է սահամանփակվել 5 տարով։

Հուլիսի 24-ի գիշերը մոսկովյան Մարինո թաղամասում հայերի և ադրբեջանցիների միջև հերթական բախումն էր եղել։ Օրվա ընթացքում նմանատիպ տարբեր բախումներ են եղել նաև քաղաքի այլ հատվածներում։

Հուլիսի 12-ից 16-ին հայ-ադրբեջանական սահմանային բախումներից հետո արտերկրում ևս հայերի և ադրբեջանցիների հարաբերությունները սրվել էին։ Բախումներ են եղել նաև Լոնդոնում, Լոս Անջելեսում։ Ավելի վաղ Ռուսաստանում ՀՀ դեսպան Վարդան Տողանյանը խնդրում է երկրում ապրող հայրենակիցներին չտրվել որևէ սադրանքի, հանգստյան օրերին լինել էլ ավելի խաղաղասեր, չպատասխանել կազմակերպված աշխարհաքաղաքական սադրանքներին։