ԱԳՆ մամուլի խոսնակ Աննա Նաղդալյանը հայտարարել է, որ հուլիսյան սահմանային սրումից հետո Ադրբեջանի դիվանագիտությունը դեգրադացվել է։ Խոսնակը մեկնաբանել է Ադրբեջանի նախագահի խորհրդականի հայտարարությունը, թե Ռուսատանը շարունակում է ինտենսիվ զինել Հայաստանին։
Հատկանշական է, որ հուլիսի մարտերից հետո էր Ադրբեջանի նախագահ Իլհամ Ալիևն ազատել 16 տարվա արտգործնախարար Էլմար Մամեդյարովին։ Նրա փոխարեն նշանակվել էր նախկինում դիվանագիտական ոլորտում փորձ չունեցած կրթության նախարար Ջեհյուն Բայրամովը:
«Վերջին շրջանում մենք Ադրբեջանից ստանում ենք խիստ իրարամերժ ազդակներ և հայտարարություններ, որոնց հիման վրա կարելի է ենթադրել, որ հուլիսյան մարտերը հուժկու հարված են հասցրել ոչ միայն Ադրբեջանի զինված ուժերին, այլև դիվանագիտական ներուժին»,- նշել է Նաղդալյանը՝ ավելացնելով՝ որքան էլ շարունակվի ադրբեջանական դիվանագիտական ներուժի դեգրադացիան, հայկական կողմն այդ մակարդակի չի իջնելու։
Հուլիսի 12-16-ը ներառյալ հայ-ադրբեջանական սահմանի տավուշյան հատվածում մարտական գործողություններ են եղել, որոնք հրահրել է Ադրբեջանը:
