Ազգային ժողովի տարածքում նոր մասնաշենքի կառուցման նպատակով հայտարարվել է նախագծման մրցույթ:Այս մասին ֆեյսբուքյան իր էջում տեղեկացրել է ԱԺ աշխատակազմի ղեկավար Տիգրան Գալստյանը:

«1. Հանձնաժողովը կազմված է 10 հոգուց, որոնք ներկայացնում են ՀՀ քաղաքաշինության կոմիտեն, Ազգային ժողովը, Երևանի քաղաքապետարանը, Ճարտարապետների պալատը և մեծամասնությամբ այն մասնագիտական է։

2. Գնահատման հիմնական չափանիշը ոչ թե գնային առաջարկն է, այլ մասնագիտական անձնակազմը և մրցույթի հայտով ներկայացվող էսքիզ նախագիծը։

3. Անկախ մրցույթի արդյունքներից սահմանվել է մրցանակային ֆոնդ՝ լավագույն երեք էսքիզ նախագծի համար, համապատասխանաբար 1մլն, 500 հազ. և 300 հազ. դրամ չափով»,-ասվում է գրառման մեջ։

Նշվում է, որ ակնկալվում է աննախադեպ մասնակցություն և արձագանքներ առաջարկվող ձևաչափի համար։

Մասնակցության հայտերն անհրաժեշտ է ներկայացնել էլեկտրոնային ձևով` էլեկտրոնային գնումների Armeps համակարգի միջոցով մինչև 2020-ի հոկտեմբերի 14-ը։