ՀՀ պաշտպանության նախարար Դավիթ Տոնոյանն օպերատիվ խորհրդակցության ժամանակ տվել է հանձնարարականներ՝ հակառակորդի զսպման, նախահարձակ գործողությունների կազմաքանդող հակազդման և Արցախի պաշտպանական բանակին անհրաժեշտ աջակցության ցուցաբերման շուրջ։ Այս մասին հայտնում է ՊՆ մամուլի խոսնակ Շուշան Ստեփանյանը։

Սեպտեմբերի 28-ի վաղ առավոտյան Տոնոյանն օպերատիվ խորհրդակցություն է անցկացրել ՊՆ, ԶՈւ Գլխավոր շտաբի և ԶՈւ ղեկավար անձնակազմի հետ:

Նրան զեկուցել են օպերատիվ իրավիճակը։

Ադրբեջանը սեպտեմբերի 27-ի վաղ առավոտյան Արցախի ուղղությամբ սկսել է օդային և հրթիռային հարձակում՝ թիրախավորելով թե ռազմական օբյեկտներ, թե քաղաքացիական ենթակառուցվածքներ, այդ թվում՝ Ստեփանակերտում։ Սեպտեմբերի 27-ի լույս 28-ի գիշերը Արցախում մարտական գործողությունները շարունակվել են, հայկական բանակը վերականգնել է որոշ կորցրած դիրքեր։

Արցախի ՊԲ-ում սեպտեմբերի 28-ի առավոտվա դրությամբ 31 զոհ կա։ Առաջին օրվա ճշտված տեղեկություններով՝ ադրբեջանական կողմն ունի մոտ 200 մարդկային կորուստ, կորցրել են նաև մոտ 30 զրահատեխնիկա և 20 ԱԹՍ։