Արցախը պետք է ձգտի վերականգնել 1994 թվականի շփման գիծը, որպեսզի Ադրբեջանի ու Թուրքիայի մոտ որևէ գայթակղություն չլինի նոր պատերազմի համար, հայտարարել է ԱՀ արտաքին գործերի նախարար Մասիս Մայիլյանը։
«Իմ կարծիքն այն է, որ մենք առնվազն պետք է վերականգնենք առաջնագիծը և միջազգային հանրությունը պետք է նպաստի դրան։ Ընդհանրապես պետք է վերականգնվի 1994 թվականի այն առաջնագիծը, որը հաստատվել էր։ Այդ գծի խախտման պատճառով է, երբ Ադրբեջանն ունեցավ որոշակի հաջողություններ, դա իրենց հնարավորություն տվեց, որ նորից պատերազմ սկսեն։ Այսինքն՝ այդ փոքր տարածքային նվաճումները մեծ պատերազմի հիմք են դառնում»,- հայտարարել է Արցախի ԱԳՆ ղեկավարը։
Ադրբեջանը սեպտեմբերի 27-ի վաղ առավոտյան Արցախի ուղղությամբ սկսել է օդային և հրթիռային հարձակում՝ թիրախավորելով թե ռազմական օբյեկտներ, թե քաղաքացիական ենթակառուցվածքներ, այդ թվում՝ Ստեփանակերտում։ ՀՀ-ում և Արցախում ռազմական դրություն է հայտարարված։
