Հոկտեմբերի 6-ի առավոտվա տվյալներով ադրբեջանական զինված ուժերը 300 զոհ են տվել, կորցրել 11 զրահատեխնիկա, 2 ուղղաթիռ և 2 անօդաչու թռչող սարք (ԱԹՍ), հայտարարել է պաշտպանության նախարարության ներկայացուցիչ Արծրուն Հովհաննիսյանը՝ հավելելով, որ այդ տվյալները չեն ներառում հոկտեմբերի 6-ի մարտերում ադրբեջանցիների կորուստները։

Հովհաննիսյանը նշել է, որ Արցախում ընթացող մարտերը հոկտեմբերի 6-ի կեսօրից հետո բավականին ինտենսիվացել են, Պաշտպանության բանակն իրականացնում է «այլ տիպի զորաշարժեր , որոնց արդյունքները հետո կերևան»։

Անդրադառնալով հարցին, թե ինչ հետևանքներ կարող է ունենալ այն, որ ռազմական գործողություններն ընթանում են Իրանի սահմանին, ՊՆ ներկայացուցիչը նշել է, որ այդ երկիրը չի սահմանափակվում միայն քաղաքական հայտարարություններով։

«Իրանը, ըստ էության, դիմում է նաև որոշակի այլ քայլերի, դրանք չեն սահմանափակվում միայն քաղաքական հայտարարություններով»,- հայտարարել է նա՝ չմանրամասնելով։

Ադրբեջանը սեպտեմբերի 27-ի վաղ առավոտյան Արցախի ուղղությամբ սկսել է օդային և հրթիռային հարձակում՝ թիրախավորելով թե ռազմական օբյեկտներ, թե քաղաքացիական ենթակառուցվածքներ, այդ թվում՝ Ստեփանակերտում։ ՀՀ-ում և Արցախում ռազմական դրություն է հայտարարված։