Անհրաժեշտ է անհապաղ դադարեցնել ռազմական գործողությունները Լեռնային Ղարաբաղում, Ռուսաստանը պատրաստ է աջակցել հակամարտության կարգավորմանը, Երևանում ԵԱՏՄ երկրների միջկառավարական խորհրդի նիստին հայտարարել է Ռուսաստանի վարչապետ Միխայիլ Միշուստինը։
Նրա խոսքով՝ անհրաժեշտ է ապահովել ռազմական գործողությունների անհապաղ դադարեցում և քայլեր ձեռնարկել հակամարտության դիվանագիտական կարգավորման համար։
«Ռուսաստանը պատրաստ է դրան աջակցել՝ ԵԱՀԿ Մինսկի խմբի մյուս համանախագահների հետ համատեղ»,- ասել է նա։
Հոկտեմբերի 9-ին Մոսկվայում սպասվում է Հայաստանի և Ադրբեջանի արտգործնախարարների Զոհրաբ Մնացականյանի և Ջեյհուն Բայրամովի հանդիպումը։ ԱԳ նախարարների հանդիպումը նախաձեռնել է Մոսկվան։ Ռուսաստանի նախագահ Վլադիմիր Պուտինը կոչ է արել դադարեցնել Ղարաբաղում ընթացող մարտական գործողությունները՝ գերիներին և զոհվածների մարմինները փոխանակելու նպատակով:
Ադրբեջանը սեպտեմբերի 27-ի վաղ առավոտյան Արցախի ուղղությամբ սկսել է օդային և հրթիռային հարձակում՝ թիրախավորելով թե ռազմական օբյեկտներ, թե քաղաքացիական ենթակառուցվածքներ, այդ թվում՝ Ստեփանակերտում։ ՀՀ-ում և Արցախում ռազմական դրություն է հայտարարված։
