ՀՅԴ Գերագույն մարմնի անդամ Իշխան Սաղաթելյանը հայտարարել է, որ կուսակցության համար շարունակում է անընդունելի մնալ «տարածքներ խաղաղության դիմաց» բանաձևը։
«Դաշնակցության համար անընդունելի է առանց Արցախի անկախության ճանաչման հակամարտության լուծման որևէ տարբերակ։ Դաշնակցության համար անընդունելի է հարցի փուլային լուծման շրջանառվող որևէ տարբերակ», - նշել է Սաղաթելյանը՝ ասելով, որ այս պատերազմում չհաղթելու իրավունք չկա։
Սաղաթելյանի խոսքով՝ սեղանին պետության գոյության հարցն է, պետք է բեկում մտցնել ռազմաճակատում ու գնալ դեպի հաղթանակ, այլ տարբերակ պարզապես չկա։
Ավելի վաղ 13 կուսակցություն, այդ թվում՝ ՀՅԴ-ն, համատեղ դիմել էին ՀՀ կառավարությանը և պահանջել հրատապ կարգով ստեղծել ռազմաքաղաքական հարցերի օպերատիվ կառավարման շտաբ-պետական հատուկ մարմին՝ օժտելով նրան որոշումներ ընդունելու, օպերատիվ գործողություններ ծրագրելու և համակարգելու իրավասություններով:
Ադրբեջանը սեպտեմբերի 27-ի վաղ առավոտյան Արցախի ուղղությամբ սկսել է օդային և հրթիռային հարձակում՝ թիրախավորելով թե ռազմական օբյեկտներ, թե քաղաքացիական ենթակառուցվածքներ, այդ թվում՝ Ստեփանակերտում։ Հրետակոծություններից վիրավորվել են նաև տեղացի և ֆրանսիացի լրագրողներ։ ՀՀ-ում և Արցախում ռազմական դրություն է հայտարարված։
