Պաշտպանության բանակի ստորաբաժանումների կողմից գերեվարվել է հերթական ահաբեկիչը, որի հարցաքննությունը որևէ կասկած չի թողնում ադրբեջանական ճակատային գծում ահաբեկիչների առկայության մասին:
Գերեվարված իսլամիստ-ծայրահեղական ահաբեկչի անունը Մհրեբ Մուհամմադ Ալշխերի է: Ծնունդով Սիրիայի Համմա քաղաքից է:
Պատմում է, որ ամուսնացած է և ունի երեք երեխա: Խոստովանում է, որ Թուրքիայի կողմից 250 այլ ահաբեկչի հետ միասին արցախա-ադրբեջանական ճակատային գծում է հայտնվել հոկտեմբերի 19-ին:
Նա ասել է, որ իրենց խոստացել էին 2000 դոլար վարձավճար, որը, սակայն, չի վճարվել: Վիրավորվելուց հետո զինակիցներն իրեն լքել են: Պատմում է, որ ճակատային գծում իրենք գնում են առջևից, իսկ 2-րդ, 3-րդ գծով արդեն առաջ են շարժվում ադրբեջանցի զինվորականները:
Ահաբեկիչը պատմել է նաև, որ մինչ ռազմաճակատ բերվելը մասնակցել են ճամբարային հավաքների, որտեղ իրենց հետ աշխատել են թուրք ռազմական հրահանգիչները:
Պաշտպանության բանակը հրապարակել է ահաբեկչի հարցաքննության տեսանյութը։