Իլ-76 ինքնաթիռներով Լեռնային Ղարաբաղ են տեղափոխվել խաղաղապահ ուժերի ինժեներասակրավորական ստորաբաժանման զինծառայողներ և հատուկ տեխնիկա։ Այս մասին, ՏԱՍՍ-ի փոխանցմամբ, հայտնում է Ռուսաստանի պաշտպանության նախարարությունը։
Սակրավորները կատարելու են ինժեներական հետախուզության, տեղանքի ականազերծման, ինչպես նաև էվակուացման ճանապարհների պատրաստման և աջակցման, ջրերի մաքրման և ինժեներական սպասարկման այլ առաջադրանքներ։
Ղարաբաղում տեղակայվում է 1960 զինծառայող: Խաղաղապահ զորքերի կազմում ՌԴ ԶՈւ Կենտրոնական ռազմական շրջանի 15-րդ առանձին մոտոհրաձգային բրիգադի ստորաբաժանումներն են:
Կողմերի ստանձնած պայմանավորվածությունների կատարումը վերահսկելու համար դիտակետեր են ստեղծվել Ղարաբաղի շփման գծի և Լաչինի միջանցքի երկայնքով:
ՀՀ վարչապետը հայտարարել էր, որ ՌԴ ու Ադրբեջանի նախագահների հետ պատերազմի դադարեցման հայտարարություն է ստորագրել։ Ըստ դրա՝ Ադրբեջանը և Հայաստանը կանգ են առնում իրենց զբաղեցրած դիրքերում: Իսկ ՌԴ խաղաղապահները տեղակայվում են ԼՂ շփման գծի երկայնքում և Հայաստանի հետ կապող միջանցքում: