Մարդու իրավունքների եվրոպական դատարանը բավարարել է ՀՀ միջնորդությունը և Ադրբեջանին պարտավորեցրել նոյեմբերի 11-ին առևանգված քաղաքացիական 10 անձի մասով տրամադրել տեղեկատվություն մինչև նոյեմբերի 30-ը։ Այս մասին հայտնում է ՄԻԵԴ-ում ՀՀ ներկայացուցչի ֆեյսբուքյան էջը։
Բացի այդ, հայ 9 ռազմագերու մասով Ադրբեջանի նկատմամբ կիրառել է միջանկյալ միջոց՝ պահանջելով տրամադրել նրանց վերաբերյալ տեղեկատվություն և հայտնել փոխանակման ժամկետների մասին մինչև նոյեմբերի 27-ը:
Նոյեմբերի 10-ին ՀՀ վարչապետ Նիկոլ Փաշինյանը հայտարարել էր, որ ՌԴ և Ադրբեջանի նախագահների հետ ստորագրել է պատերազմը դադարեցնելու մասին հայտարարություն, որի կետերից մեկով նախատեսված է զոհվածների մարմինների և գերիների փոխանակում։
Վարչապետ Նիկոլ Փաշինյանը հայտարարել էր, որ գերիների փոխանակման գործընթացը կսկսի մարմինների փոխանակումից հետո։