ՀՀ-ից և Ադրբեջանից լոլիկի և այլ պտուղբանջարեղենի ներկրումն արգելելու մասին որոշումը կայացվում է համապատասխան գերատեսչությունում և Կրեմլի իրավասությունից դուրս է։ Այդ մասին հայտարարել է ՌԴ նախագահի մամուլի քարտուղար Դմիտրի Պեսկովը։
«Բնականաբար, դա արվում է կառավարության հետ գործակցությամբ և կան հստակ չափանիշներ, որոնց հիման վրա էլ ընդունվում են այդ որոշումները։ Գիտեք, որ այդ որոշումները կապված են վիրուսների հետ, և պանդեմիայի պայմաններում, բնականաբար, դա առանձնահատուկ ուշադրության է արժանանում։ Կրեմլի հետ գործողությունները համաձայնեցնելու կարիք չի առաջանում»,- ասել է Պեսկովը, գրում է ՌԻԱ Նովոստին։
Ռոսսելխոզնադզորը դեկտեմբերի 10-ից արգելել է Ադրբեջանից խնձորի և լոլիկի ներմուծումը ՌԴ ՝ վնասատուների առկայության պատճառով։ Դեկտեմբերի 14-ից նույն գերատեսչությունն արգելել է լոլիկի և պղպեղի ներմուծումը ՌԴ ՀՀ Արմավիրի մարզից։
