Հաշվի առնելով 2020-ին Ադրբեջանի և Թուրքիայի սանձազերձած պատերազմական գործողությունները, որոնք էական ազդեցություն են ունեցել ՀՀ բնակչության սոցիալական վիճակի վրա՝ առաջարկվում է ընդլայնել ԽՍՀՄ Խնայբանկի ՀԽՍՀ հանրապետական բանկում ներդրած ավանդների փոխհատուցման հնարավորություն ունեցող շահառուների ցանկը:
Նման նախաձեռնությամբ են հանդես եկել Ազգային ժողովի «Իմ քայլը» խմբակցության պատգամավորներ Արտակ Մանուկյանը և Նարեկ Զեյնալյանը։
Առաջարկվում է որպես ծրագրի շահառու դիտարկել նաև ՀՀ պաշտպանության մարտական գործողությունների մասնակից ինչպես նաև մարտական գործողությունների հետևանքով չօգտագործվող և հակառակորդի կողմից հողատարածքների գնդակոծման դեպքեր ունեցող` Հայաստանի սահմանամերձ համայնքներում 2014-ի օգոստոսի 1-ի դրությամբ հաշվառված անձանց:
Ընդունման դեպքում ակնկալվում է թիրախային համայքներում հաշվառված շահառուներին ապահովել ավանդների փոխհատուցման հնարավորությամբ՝ միաժամանակ նպատակ ունենալով բարելավել թիրախային համայնքների բնակիչների ընդհանուր սոցիալական վիճակը:
2021-ի պետական բյուջեի մասին օրենքով սահմանված կարգով շարունակվելու է «ՎՏԲ-Հայաստան բանկ» ՓԲԸ-ում ավանդատու հանդիսացող քաղաքացիների՝ որպես նախկին ԽՍՀՄ Խնայբանկի ՀԽՍՀ հանրապետական բանկում մինչև 1993 թվականի հունիսի 10-ը ներդրված դրամական ավանդների դիմաց փոխհատուցման միջոցառումը:
