Բանակի տոնը դիմավորում ենք պատերազմի ողբերգական հետևանքների ցավը մեր հոգում, հայտարարել է կաթողիկոս Գարեգին Բ-ն ՀՀ զինված ուժերի կազմավորման 29-ամյակի առթիվ բանակին հղված կոչում։
Նա նշել է, որ դարերի ընթացքում հայ զինվորը ցուցաբերել է մեծ արիություն՝ հերոսաբար պաշտպանելով հայրենիքն ու հարազատ ժողովրդին։ Գարեգին Բ-ն ընդգծել է նաև ազգային փոքրամասնությունների դերը արցախյան պայքարում։
«Արցախի պաշտպանության համար մղված պատերազմներում Հայոց բանակի քաջարի զորահրամանատարներն ու զինվորները, որոնց թվում ազգային փոքրամասնությունների խրոխտ զավակներ, նույն խիզախ ոգով հերոսաբար պայքարեցին հանուն հայրենիքի, և շատեր իրենց կյանքը նվիրեցին՝ ի սեր հայրենյաց և ազգի», - ընդգծել է նա։
Կաթողիկոսը վստահություն է հայտնել, որ աշխարհասփյուռ հայությունն անցյալի հաղթանակների ոգով պիտի կերտի նոր հաջողություններ ու ձեռքբերումներ, վերականգնի կյանքն Արցախում և Հայաստանում՝ «նաև ի պանծացումն հանուն հայրենյաց զոհված մեր զավակների խնկելի հիշատակի»։
