Արցախի նախագահ Արայիկ Հարությունյանը հանդիպել է ՀՀ վարչապետ Նիկոլ Փաշինյանին և Զինված ուժերի Գլխավոր շտաբի պետ Օնիկ Գասպարյանին: Վերջինիս հետ հանդիպմանը հրաժարականի պահանջ չի ներկայացրել, լուրն իրականությանն ընդհանրապես չի համապատասխանում, ասել է Հարությունյանի խոսնակ Լուսինե Ավանեսյանը՝ մեկնաբանելով միջնորդական ջանքերի վերաբերյալ որոշ հրապարակումներ։
«Փաշինյանի ու Գասպարյանի հետ ԱՀ նախագահը քննարկել է առկա իրավիճակի հաղթահարման հետ կապված որոշ հարցեր՝ հիմք ընդունելով Հայաստանի ու Արցախի ներքին կայունության ու արտաքին անվտանգության առաջնահերթությունները: Օնիկ Գասպարյանի հետ հանդիպման ժամանակ ընդհանրապես չի քննարկվել հրաժարականի հարցը, և որևէ ճնշման մասին խոսք չի կարող լինել»,- հայտնել է Ավանեսյանը, փոխանցում է Artsakhpress-ը։
Նա նշել է, որ Գասպարյանի հետ հանդիպմանը մասնակցել է ոչ միայն ՀՀ ազգային անվտանգության տնօրեն Արմեն Աբազյանը, այլև ԱՀ անվտանգության խորհրդի քարտուղար Վիտալի Բալասանյանը և մեկ այլ պաշտոնատար անձ:
Փետրվարի 25-ին Հայաստանում Զինված ուժերի Ֆլխավոր շտաբը պահանջել էր վարչապետի ու կառավարության հրաժարականը։ Վարչապետ Փաշինյանն իր աջակիցներին օրվա ընթացքում հրավիրել էր Հանրապետության հրապարակ, ԳՇ գործողությունը որակել՝ ռազմական հեղաշրջման փորձ:
