Վարչապետ Նիկոլ Փաշինյանը ապրիլի 1-ին ընդունել է Ռուսաստանի Դաշնության կառավարության նախագահի տեղակալ, փոխվարչապետ Ալեքսեյ Օվերչուկին:
Հանդիպմանն առանձնակի ընդգծվել է հումանիտար պայմանավորվածությունների կատարման կարևորությունն ու տարածաշրջանում կայունության ամրապնդման անհրաժեշտությունը։
«Զրուցակիցները քննարկել են Հայաստանի, Ռուսաստանի և Ադրբեջանի փոխվարչապետների գլխավորությամբ ստեղծված աշխատանքային խմբի գործունեությանը, տարածաշրջանային կոմունիկացիոն ենթակառուցվածքների ապաշրջափակման հնարավորություններին և այս ուղղությամբ տարվող աշխատանքներին վերաբերող հարցեր»,-հայտնում են վարչապետի աշխատակազմից։
Նրանք մտքեր են փոխանակել նաև հայ-ռուսական տնտեսական համագործակցության օրակարգային հարցերի շուրջ։
Ավելի վաղ Երևանում Օվերչուկը հանդիպել էր փոխվարչապետ Մհեր Գրիգորյանին։ Հունվարի 11-ին Հայաստանի, Ռուսաստանի ու Ադրբեջանի առաջնորդներ Նիկոլ Փաշինյանի, Վլադիմիր Պուտինի ու Իլհամ Ալիևի բանակցություններից հետո հայտարարվել էր երեք երկրների փոխվարչապետների ղեկավարությամբ աշխատանքային խմբի ստեղծման մասին:
