Արցախի ԱԳ նախարար Դավիթ Բաբայանը հայտարարել է, որ Կարմիր շուկան Ադրբեջանին հանձնելու որևէ նպատակ չկա ու չի էլ կարող լինել:

Նա նաև ընդգծել է, որ ամեն ինչ անելու են եղածը պահպանելու համար, գրում է Aysor.am-ը։

«Որևէ մեկը Կարմիր Շուկայի կարգավիճակը չի փոխել: Կարմիր շուկան հայկական է, Արցախի Հանրապետության Մարտունու շրջանի տարածաքում է գտնվում, հետևաբար, դրա կարգավիճակը փոխելու, Ադրբեջանին հանձնելու որևէ նպատակ չկա, չի էլ կարող լինել: Սա թող բոլորի համար պարզ լինի», - նշել է նախարարը:

Նա նշել է նաև, որ ապաշրջափակումը, կոմունիկացիաների բացումը, իր կարծիքով, պետք է լինի զուտ տնտեսական հարթությունում։

«Թուրքիան եղել է և կմնա հայոց պետականության ամենամեծ վտանգներից մեկը: Դրա մասին իրենք են հայտարարել: Դրանք իմ ասածը չէ, պաշտոնական Անկարայի ու Բաքվի հայտարարություններն են և ոչ միայն հայտարարությունները, այլև՝ գործողությունները», - նշել է նա:

Բաբայանի խոսքով՝ պատերազմի ժամանակ Թուրքիան նորից իր դեմքը ցույց տվեց. «Շատերը, գուցե, մոռացել էին նրա դեմքը, բայց նա նորից ցույց տվեց, հետևաբար, պետք է շատ խելացի, իրատեսական քաղաքականություն վարենք, երբևիցե չմոռանանք՝ ում հետ գործ ունենք»:

ԱԳ նախարարը նկատել է՝ լավ է, որ ուզում ենք տարբեր երկրների հետ հարաբերություններ լավացնել, բայց այլ հարց է՝ այդ երկրներն ուզո՞ւմ են մեզ հետ հարաբերությունները լավացնել և ի՞նչ գնով են ուզում անել դա:

Ավելի վաղ Արցախի նախագահ Արայիկ Հարությունյանը, անդրադառնալով մամուլում պարբերաբար շահարկվող Կարմիր շուկայի թեմային, շեշտել էր, որ նման խոսակցությունները որևէ հիմք չունեն։

Մարտունու շրջանի Կարմիր Շուկա բնակավայրը գտնվում է հանրապետության հարավարևելյան հատվածում և 44 օրյա պատերազմի արդյունքում հայտնվել է շփման գծի մոտակայքում։