Վարչապետի պաշտոնակատար Նիկոլ Փաշինյանը, կառավարության նիստում անդրադառնալով հայ-ադրբեջանական սահմանին տիրող իրավիճակին, ասել է, որ ՀՀ տարածքում այժմ 500-600 ադրբեջանցի զինծառայող կա և իրավիճակը լարված է մնում։

Ըստ Փաշինյանի, հայկական ԶՈւ քայլերը միտված են մարտավարական գործողություններով սահմանափակելու ադրբեջանցիների գործողությունների պոտենցիալը:

«Քաղաքական առումով մեր խնդիրը հետևյալն է՝ թույլ չտալ, որ իրավիճակը դուրս գա վերահսկողությունից, առավելագույնն անել ռազմական բախման որևէ սցենար բացառելու համար, հասնել նրան, որ ադրբեջանցի զինծառայողները լքեն ՀՀ տարածքը», - ասել է Փաշինյանը։

Վարչապետի պաշտոնակատարն ասել է նաև, որ ահռելի դիվանագիտական աշխատանք է կատարվել և կատարվում։

Մայիսի 19-ին, ժամը 14։00-ին պետք է շարունակվեին ադրբեջանական ԶՈՒ կողմից հայ-ադրբեջանական սահմանին իրականացված սադրանքի հետևանքով ստեղծված իրադրության խաղաղ հանգուցալուծման շուրջ բանակցությունները։ Չնայած վաղօրոք ձեռք բերված պայմանավորվածությանը՝ ադրբեջանական կողմը բանակցություններին չի ներկայացել։