ԱԺ փոխնախագահ Ալեն Սիմոնյանը Ազգային ժողովի արտահերթ նիստում, խոսելով առաջիկա ընտրությունների մասին, ասել է, որ ՀՀ երկրորդ նախագահ, «Հայաստան» դաշինքը գլխավորող Ռոբերտ Քոչարյանի մրցակիցը Սերժ Սարգսյանն է ու անցյալը։
«Ռոբերտ Քոչարյանի, իր դաշինքի, դաշնակցականների հիմնական մրցակիցն անցյալն են ու Սերժ Սարգսյանը։ Գնացեք մրցեք»,- ասել է Սիմոնյանը։
Աժ փոխխոսնակն ասել է նաև, որ ընդդիմադիր թեկնածուներից մեկն ասոցացվում է մահվան հետ։ «Քոչարյանի իշխանավարության ընթացքում հոկտեմբերի 27 է տեղի ունեցել, մարտի 1 է եղել։ Նրա օրոք զուգարանում մարդու գլուխն այնքան են խփել լվացարանին, որ մահացել է։ Դրա համար էլ ասոցացվում է»,- ասել է Սիմոնյանը։
Ըստ նրա, ընտրություններից հետո Ռոբերտ Քոչարյանի դաշինքը փուչիկի պես պայթելու է։
«Հայաստան» դաշինքի անդամ են ՀՅԴ-ն և «Վերածնվող Սյունիք» կուսակցությունը։ Խորհրդարանական արտահերթ ընտրությունները նախատեսված են հունիսի 20-ին։