«Հայոց Արծիվներ, միասնական Հայաստան» կուսակցությունը չի մասնակցի ընտրություններին։ Այդ մասին Հանրային հեռուստաընկերության եթերում հայտարարել է կուսակցության առաջնորդ Խաչիկ Ասրյանը՝ հավելելով, որ դադարեցվում է քարոզարշավը։

Ասրյանը քարոզարշավի դադարեցումը բացատրել է Հայաստանի տարածքային ամբողջականությանը սպառնացող վտանգով։ Ըստ նրա՝ քանի դեռ ՀՀ որոշ տարածքներ օկուպացված են, ընտրությունները չեն կարող անցնել ՀՀ ամբողջ տարածքում։ Ուստի, Ասրայնը կոչ է արել չեղարկել արտահերթը։

Նա հավելել է, որ պետք է միասնական ուժերով վտարել ադրբեջանցիներին ՀՀ տարածքից, հետո նոր ընտրություններ անցկացնել։

Ասրյանը պարզաբանել է, որ կուսակցությունը գրանցվել էր ընտրություններին մասնակցելու համար այն պայմանով, որ եթե մինչև քարոզարշավի մեկնարկն ադրբեջանցիները հեռացած չլինեն ՀՀ տարածքից, դուրս կգան ընտրապայքարից։

Խորհրդարանական արտահերթ ընտրությունները կայանալու են հունիսի 20-ին, իսկ էլեկտրոնային քվեարկությունը՝ հունիսի 11-ից մինչև հունիսի 13-ը։