ՀՀ երկրորդ նախագահ, «Հայաստան» դաշինքի առաջնորդ Ռոբերտ Քոչարյանը Ստեփանավանում քաղաքացիների հետ հանդիպմանը հայտարարել է, որ Հայաստանը չի կարող թռիչքաձև աճ ունենալ առանց մեծածավալ ներդրումների։

«Իսկ ո՞վ է ներդրումներ անում այնտեղ, որտեղ բոլորն իրար ատում են: Փողն ամենազգույշ «կենդանին» է: Որտեղ լարվածություն կա, որտեղ կանխատեսելիություն չկա, այդտեղից փախնում է: Այս երկրում օրական մի բան փոխվում է՝ մի բան են ասում, օրվա կեսին մեկ այլ բան են ասում, երեկոյան՝ մի ուրիշ բան»,- ասել է նա՝ հավելելով, որ գալիս են այդ վիճակը փոխելու։

Քոչարյանն ասել է, թե հիմա բոլորն ասֆալտից են խոսում:

«Փաստորեն այստեղ 2003-ի ասֆալտն է։ Երբ գալիս էինք, տպավորություն էր, որ 15 տարում բան չի փոխվել։ Այն ժամանակ ամբողջ երկիրը ասֆալտով փակել էինք»,- ասել է նա։

Խոսելով անվտանգությունից՝ Քոչարյանն ասել է, որ բանակ չունեցող երկիրը չի կարող հարևաններից մշտական վախի մեջ չապրել, իսկ այս իշխանությունն այս վիճակում բանակի ծախսերը կրճատում է։

Խորհրդարանական արտահերթ ընտրությունները կայանալու են հունիսի 20-ին։