Թուրքիան տրամադրված է Ռուսաստանը շրջանցող եւ Կասպիայի շրջանի բնական գազի մատակարարման հաշվին Nabucco նախագծի իրականացմանը: Այդ մասին հայտնել է Թուրքիայի էներգետիկայի նախարար Հիլմի Գյուլերը:

«Մենք նպատակ ենք դնում ավարտել Nabucco նախագիծը: Եթե դրա անհրաժեշտությունը կա, այն պետք է իրագործվի` անկախ այն բանից, թե որտեղ են գտնվում էներգակիրների աղբյուրները: Մեծ նախագծերում փոքր խոչընդոտները երբեք չեն խանգարում դրանց իրագործմանը»,- Անկարայում լրագրողներին է ասել նախարարը: Նա նաեւ նշել է, որ նախագծի վերաբերյալ թուրքական մշակումներն ուղղվել են Իրանին, եւ Անկարայում սպասում են նրանց պատասխանին, գրում են թուրքական ԶԼՄ-ները:

7,3 մլրդ եվրո ընդհանուր արժողությամբ Nabucco նախագիծը նախատեսում է Կասպիական ավազանի բնական գազը Ադրբեջանի տարածքով, Վրաստանով, Թուրքիայով, Բուլղարիայով, Հունգարիայով, Ռումինիայով եւ Ավստրիայով փոխադրել եվրոպական երկրներ: Նախագիծը կոչված է դառնալու Թուրքիայի տարածքով անցկացված Բաքու-Թբիլիսի-Էրզրում գազատարի շարունակությունը եւ հաշվարկված է տարեկան 20-30 մլրդ խորանարդ մետր գազի հոսքի համար: Գազատարի շինարարությունը ծրագրվում է սկսել 2011թ., իսկ նրանով գազի մատակարարումները` 2014թ.: