ՀՀ քննչական կոմիտեի նախագահ Արգիշտի Քյարամյանն ընդունել է ՀՀ-ում ՌԴ արտակարգ և լիազոր դեսպան Սերգեյ Կոպիրկինին: Հանդիպման ընթացքում քննարկվել են երկու երկրի իրավապահ մարմինների գործակցությանը վերաբերող հարցեր:
Քյարամյանը հույս է հայտնել, որ ձևավորված փոխգործակցությունն ապագայում ավելի մեծ թափ կստանա և կընդլայնվի, հայտնում են ՔԿ մամուլի բաժնից։
Երկարամյա գործակցության ընթացքում իրականացվել են համատեղ միջոցառումներ՝ նպաստելով քրգործերով միմյանց ցուցաբերվող միջազգային իրավական օգնության արդյունավետության բարձրացմանը։
ՔԿ ղեկավարը կարևորել է նաև հանցավորության դեմ պայքարում արդյունավետ գործակցության շարունակականությունը։
Կոպիրկինը, շնորհակալություն հայտնելով ջերմ ընդունելության համար, շնորհավորել է Քյարամյանին՝ պաշտոնի նշանակվելու առթիվ:
Դեսպանը, իր հերթին բարձր գնահատելով երկու երկրի իրավապահ մարմինների միջև շփումները, շեշտել է ՀՀ-ում ՌԴ դեսպանության պատրաստակամությունը՝ աջակցելու քննչական մարմինների միջև գործակցության զարգացմանը:
Հանդիպման ավարտին կողմերը պայմանավորվածություն են ձեռք բերել՝ շարունակել և ընդլայնել օրակարգային խնդիրների պարբերաբար քննարկումները: