Վարչապետ Նիկոլ Փաշինյանը, կառավարության նիստում խոսելով զինված ուժերի արդիականացման մասին, հայտարարել է, որ տարածքներ նվաճելու մտադրություն չկա։
Նա հավելել է, որ Հայաստանի զինված ուժերը պետք է զարգանան և վերափոխվեն ոչ թե ագրեսիայի, այլ հնարավոր ագրեսիայից պաշտպանվելու համար։
«Մենք տարածքներ նվաճելու մտադրություն չունենք։ Մեր նպատակը մեր ինքնիշխանությունը և տարածքային ամբողջականությունը պաշտպանելն է։ Ագրեսիվ որևէ մտադրություն չունենք և տարածաշրջանի խաղաղությունը, կայունությունը մեր երկարատև ռազմավարությունն է»,-ասել է Փաշինյանը։
Խոսելով հարևանների հետ հարաբերությունների մասին՝ Փաշինյանն ասել է, որ սահմանակից երկրների հետ հարաբերությունների խորացումը կամ կարգավորումը Հայաստանի կառավարության արտաքին քաղաքականության կարևոր ուղղություններից է լինելու։
