Թուրքիայի նախագահ Ռեջեփ Թայիփ Էրդողանն Ադրբեջանում հայտարարել է, որ Անկարան պատրաստ է կարգավորել հարաբերությունները Երևանի հետ, եթե վերջինս լուծի իր խնդիրները Բաքվի հետ։
«Ամուր խաղաղության կառուցման համար պայմաններն այժմ բարենպաստ են, ինչպես երբեք։ Այդ հարցում Հայաստանը պետք է Ադրբեջանի հետ խնդիրները կարգավորելու անկեղծ կամք դրսևորի։ Եթե նա անի դա, ոչ մի խոչընդոտ չի լինի Թուրքիայի և ՀՀ հարաբերությունների կարգավորման համար»,-ասել է Էրդողանը, գրում է ՏԱՍՍ-ը։
Նա նշել է, որ Թուրքիայի մասնակցությամբ իրականացվող ենթակառուցվածքային նախագծերը շահավետ տնտեսական և առևտրային հարաբերություններ կստեղծեն տարածաշրջանի բոլոր երկրների համար։
«Ադրբեջանի բոլոր հարևանները, այդ թվում Իրանը, Վրաստանը և Հայաստանը, կշահեն դրանից»,-ասել է Էրդողանը։
Հոկտեմբերի 26-ին Ադրբեջանի նախագահ Իլհամ Ալիևը և Թուրքիայի նախագահ Ռեջեփ Թայիփ Էրդողանն օկուպացված Վարանդայում (Ֆիզուլի) մասնակցել են նորակառույց միջազգային օդանավակայանի բացմանը։