Բանասեր, թարգմանիչ, բանաստեղծ Հակոբ Հակոբյանը (Հակոբ Մովսես) ընտրվել է Հեռուստատեսության և ռադիոյի հանձնաժողովի անդամի թեկնածու։ Նրա թեկնածությունը ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի արտահերթ նիստում առաջադրել էր ԱԺ «Քաղաքացիական պայմանագիր» խմբակցությունը։
ԱԺ «Քաղաքացիական պայմանագիր» խմբակցությունն առաջադրել էր նաև Արթուր Մանուկյանի թեկնածությունը, իսկ «Հայաստան» խմբակցությունը՝ Մանվել Բադալյանի:
Մովսեսը ներկայացրել է ընտրվելու դեպքում աշխատանքի իր պատկերացումներն ու տեսլականը, անդրադարձել բարեփոխման կարիք ունեցող հարցերին, հանրության վրա հեռուստատեսության ունեցած մեծ ազդեցությանը: Հանձնաժողովը կողմ է քվեարկել Հակոբ Հակոբյանի թեկնածությանը:
Հանձնաժողովը կողմ է քվեարկել նաև Մանուկյանի թեկնածությանը:
«Հայաստան» խմբակցության առաջադրած թեկնածու Բադալյանին դեմ են քվեարկել՝ հաշվի առնելով նրա՝ ոլորտի հետ կապ չունենալու հանգամանքը:
«Ազգային ժողովի կանոնակարգ» սահմանադրական օրենքի 145-րդ հոդվածի համաձայն՝ Հեռուստատեսության և ռադիոյի հանձնաժողովի անդամներն ԱԺ նիստում ընտրվում են գաղտնի քվեարկությամբ, պատգամավորների ընդհանուր թվի ձայների առնվազն երեք հինգերորդով: