ՆԱՏՕ-ն լրացուցիչ ուժեր է ուղարկում Արևելյան Եվրոպա` Ուկրաինայի շուրջ ստեղծված իրավիճակի կապակցությամբ։ Այդ մասին ասվում է ՆԱՏՕ-ի հայտարարության մեջ, տեղեկացնում է ՏԱՍՍ-ը։
«ՆԱՏՕ-ի գծով դաշնակիցները պատրաստականության են բերում ուժերը և լրացուցիչ նավեր ու կործանիչներ ուղարկում Արևելյան Եվրոպայում տեղակայվելու համար՝ ամրապնդելով դաշնակիցների պաշտպանությունը, քանի որ Ռուսաստանը շարունակում է ռազմական հզորություններ կուտակել Ուկրաինայում և Ուկրաինայի շուրջ»,-ասվում է Բրյուսելում հրապարակված հայտարարության մեջ։
Ավելի վաղ հայտնի դարձավ, որ ԱՄՆ Պետքարտուղարությունը հրահանգել է Ուկրաինայում ԱՄՆ դեսպանատան աշխատակիցների ընտանիքներին լքել Կիևը։ Մեծ Բրիտանիան հայտարարել է իր դեսպանատան որոշ աշխատակիցներին և նրանց ընտանիքներին Կիևից հետ կանչելու վերաբերյալ։
Վերջին շրջանում Ուկրաինան և Արևմուտքի մի շարք երկրներ հայտարարում են, թե Ռուսաստանը մտադիր է հարձակվել Ուկրաինայի վրա և այդ նպատակով ռազմական ուժեր է կուտակում Ուկրաինայի հետ սահմանին։ ՌԴ նախագահի մամուլի քարտուղար Դմիտրի Պեսկովն այդ տեղեկությունները սին և անհիմն է անվանել։
