Գործարար այցով Ղրիմից պաշտոնական պատվիրակություն է ժամանել Հայաստան։ Այդ մասին հայտնել է Ղրիմի կառավարության փոխվարչապետ, ֆինանսների նախարար Իրինա Կիվիկոն, հայտնում է ՌԻԱ Նովոստին։
Պատվիրակության կազմում են նաև ՌԴ նախագահին կից Ղրիմի մշտական ներկայացուցիչ Գեորգի Մուրադովը, տնտեսական զարգացման նախարարության և գործարար համայնքի ներկայացուցիչներ։
Կիվիկոն հայտնել է, որ Ղրիմի պատվիրակությունը մասնակցելու է Ղրիմի օրերին, ինչպես նաև ներկայացնելու է Ղրիմի ներդրումային և տնտեսական ներուժը։ Կայանալու են նաև գործարարների երկկողմ հանդիպումներ։
Պատվիրակությունը հանդիպելու է ՀՀ-ում ՌԴ դեսպանի, ՀՀ-ում ՌԴ Առևտրի ներկայացուցչի, ՀՀ նախարարությունների և գերատեսչությունների ներկայացուցիչների հետ։ Նշվում է, որ տեղի է ունենալու նաև «Ղրիմի գարուն՝ հավերժ միասին» լուսանկարչական ցուցահանդես, նվիրված ՌԴ-ի հետ Ղրիմի միավորման 8-ամյակին, և տոնական համերգ։
ՌԴ-ին Ղրիմի միավորման վերաբերյալ ՀՀ-ն ոչ մի ճանաչող հայտարարությամբ հանդես չի եկել և չեզոք դիրքորոշում է զբաղեցնում՝ Ուկրաինայում շարունակվող պատերազմի ամբողջ ընթացքում։