Ռուսաստանի արտգործնախարար Սերգեյ Լավրովը, ՀՀ ԱԳ նախարար Արարատ Միրզոյանի հետ բանակցությունների մեկնարկին, հայտարարել է, որ ռուս խաղաղապահները Լեռնային Ղարաբաղում շարունակում են գործել իրենց մանդատին համապատասխան։
Նա ասել է նաև, որ Մոսկվան կշարունակի ապահովել Լեռնային Ղարաբաղի վերաբերյալ ՌԴ, ՀՀ և Ադրբեջանի ղեկավարների եռակողմ պայմանավորվածությունների կատարումը, գրում է ՏԱՍՍ-ը։
«Ղարաբաղյան կարգավորման մասով պայմանավորվածությունների 3 խումբ կա, որոնք ձեռք են բերվել 2020 թվականի նոյեմբերին, 2021-ի հունվարին և նոյեմբերին։ Եվ մենք կշարունակենք ապահովել այդ պայմանավորվածությունների կատարումը, ներառյալ Ղարաբաղում ռուսական խաղաղապահ զորախմբի գործունեությունը՝ իր մանդատին խիստ համապատասխան»,–ասել է Լավրովը։
Լավրովը նաև անպատասխանատու է անվանել ԵԱՀԿ Մինսկի խմբից ՌԴ-ին հեռացնելու փորձերը։ Նա հայտարարել է, որ ԱՄՆ-ն և Ֆրանսիան պատրաստ են զոհաբերել կարգավորման շահերը տարածաշրջանում։
Արարատ Միրզոյանը Ռուսաստանի Դաշնությունում է աշխատանքային այցով։ Մոսկվայում նա կհանդիպի նաև ՀԱՊԿ Գլխավոր քարտուղար Ստանիսլավ Զասի հետ:
Ապրիլի երկրորդ տասնօրյակում նախատեսվում է ՀՀ վարչապետ Նիկոլ Փաշինյանը պաշտոնական այցը Մոսկվա, որին նախորդող Միրզոյանի այցը նախապատրաստական է։