Ադրբեջանում հրապարակել են Լաչինի միջանցքի շրջանակում Բերձորը շրջանցող նոր ճանապարհի շինարարության լուսանկարները, որով Հայաստանը կապ կունենա Ստեփանակերտի հետ։

Լայնածավալ շինաշխատանքներն ընթացքի մեջ են։ Հրապարակվել են նաև կառուցվող կամրջի լուսանկարները։

Լաչինի միջանցքն անցնում է Բերձոր և Աղավնո բնակավայրերով, որոնք, ենթադրաբար, նոր ճանապարհը շահագործման հանձնելուց հետո, անցնելու են Ադրբեջանին։

Ճանապարհի երկարությունը 32 կմ է, երթևեկելի մասի լայնությունը կկազմի 7 մ, գրում է Haqqin.az-ը։

Երբ ճանապարհը պատրաստ լինի, ռուս խաղաղապահները, ենթադրաբար, տեղափոխվելու են այնտեղ։

2020թ․ նոյեմբերի 9-ի հայտարարության 6-րդ կետում ասվում է, որ կողմերի համաձայնեցմամբ, առաջիկա 3 տարում կորոշվի ՀՀ-ն ու Լեռնային Ղարաբաղը կապող Լաչինի միջանցքով երթևեկության նոր երթուղու կառուցման պլանը՝ ռուս խաղաղապահ զորախմբի հետագա վերատեղակայմամբ, այդ երթուղում պահպանությունն ապահովելու նպատակով։