Հայաստանում ԱՄՆ դեսպան Լին Թրեյսին լրագրողների հետ զրույցում անդրադառնալով Արմենպրեսին տված իր հարցազրույցին, որտեղ նշել էր, թե «ԱՄՆ-ն ճանաչում է Լեռնային Ղարաբաղի բնակչության դերակատարումը իր ապագան որոշելու հարցում», ասել է, որ այս պահին կարևորն այդ սկզբունքի ամրագրումն է։
Լրագրողը խնդրել է ավելի մանրամասնել՝ ինչպե՞ս պետք է արտահայտվի այդ դերակատարումը, տեղեկացնում է Aysor.am-ը։
«Կարծում եմ՝ այս պահին կարևորն այդ սկզբունքի ամրագրումն է, և ոչ որոշակի մանրամասների վերհանումը։ Կարծում եմ՝ Լեռնային Ղարաբաղի ժողովուրդը, կողմերը, առաջ շարժվելու ճանապարհին զուգընթաց, այդ հարցերի վերաբերյալ պետք է համաձայնության գան», - ասել է դեսպան Թրեյսին։
Հարցազրույցում Թրեյսին ասել է, որ հակամարտության համապարփակ կարգավորման համատեքստում «ԱՄՆ-ն, որպես ԵԱՀԿ Մինսկի խմբի համանախագահ, ճանաչում է Լեռնային Ղարաբաղի բնակչության դերակատարումն իր ապագան որոշելու հարցում»:
