էկոնոմիկայի նախարար Վահան Քերոբյանը և մի խումբ այլ պաշտոնյաներ կմեկնեն Ռուսաստանի Դաշնություն։ Հունիսի 10-12-ը նրանք կլինեն Վլադիկավկազում։ Այդ մասին որոշում է ստորագրել վարչապետ Նիկոլ Փաշինյանը։
Նրանք ՌԴ են գործուղվում առևտրատնտեսական համագործակցությանն առնչվող մի շարք հարցեր քննարկելու նպատակով։
Ավելի վաղ Քերոբյանը ԱԺ-ում ասել էր, որ հունիսի 11-ին Լարսի անցակետում հանդիպելու է ՌԴ տնտեսական զարգացման նախարար Մաքսիմ Ռեշետնիկովի հետ, որի հետ քննարկելու են Վերին Լարսի թողունակության ավելացումն արագացնելու ինչ հնարավորություններ կան:
Պատվիրակության կազմում են նաև տարածքային կառավարման և ենթակառուցվածքների նախարարի տեղակալ Արմեն Սիմոնյանը, Պետական եկամուտների կոմիտեի նախագահի տեղակալ Աշոտ Մուրադյանը և Պետական եկամուտների կոմիտեի Արարատյան մաքսատուն-վարչության պետի տեղակալի ժամանակավոր պաշտոնակատար Հարություն Ազգալդյանը։
Որոշման մեջ նշվում է, որ էկոնոմիկայի նախարարը գործուղումից վերադառնալուց հետո եռօրյա ժամկետում ՌԴ գործուղման արդյունքների մասին հաշվետվություն պետք է ներկայացնի վարչապետի աշխատակազմ և արտաքին գործերի նախարարություն:
