ՌԴ ԱԳ նախարար Սերգեյ Լավրովը Հայաստանի արտգործնախարար Արարատ Միրզոյանի հետ ասուլիսում հայտնել է, որ, հաշվի առնելով հայկական կողմի ցանկությունը, ՌԴ-ն աշխատում է Հայաստանում ռուսական դպրոցների թիվն ավելացնելու ուղղությամբ։

«Հաշվի առնելով մեր հայ ընկերների ցանկությունը՝ մենք աշխատում ենք ավելացնել ռուսական դպրոցների թիվը, նպաստել ռուսերենի ուսուցիչների որակավորման բարձրացմանը և ռուսաստանյան բուհերում սովորել ցանկացող հայերի քվոտաների ավելացմանը», - նշել է Լավրովը, տեղեկացնում է Aysor.am-ը։

Նա հավելել է, որ Ռուսաստանի Դաշնությունը և Հայաստանն ամրապնդում են համագործակցությունը հումանիտար ոլորտում՝ պահպանելով միասնական կրթական, գիտական, լեզվական տարածքը։

Սերգեյ Լավրովը Երևան է ժամանել հունիսի 8-ին։ Նրա այցը պաշտոնական է։ Հունիսի 9-ին Լավրովը հանդիպումներ կունենա նաև վարչապետ Նիկոլ Փաշինյանի և ՀՀ նախագահ Վահագն Խաչատուրյանի հետ։ Հունիսի 10-ին Լավրովը կմասնակցի ՀԱՊԿ ԱԳ նախարարների Խորհրդի նիստին։ Լավրովը Երևան է ժամանել Անկարայից՝ Թուրքիայի ԱԳ նախարար Մևլութ Չավուշօղլուի հետ բանակցություններից հետո։