Ադրբեջանի ԱԳ նախարար Ջեյհուն Բայրամովը, անդրադառնալով սահմանազատման հարցին, ասել է, որ սահմանազատման հանձնաժոողովներ հաջողվել է ձևավորել տևական և բարդ գործընթացից հետո։
«Հայաստանն առաջարկում էր դեէսկալացիայի միջոցներ ձեռնարկել սահմանին և հետ քաշել զորքերն ու սահմանապահներին սահմանից, սակայն, ադրբեջանական կողմը հրաժարվել է, քանի որ իր սահմանները պաշտպանելն Ադրբեջանի սահմանադրական իրավունքն ու պարտականությունն է»,- ասել է նա, գրում է Interfax.az-ը։
Նա հայտնել է նաև, որ հայ-ադրբեջանական սահմանի սահմանազատման հանձնաժողովների երկրորդ նիստի օրը դեռ որոշված չէ, իսկ, ընդհանուր առմամբ, «սահմանազատման գործընթացը հեշտ չի լինելու»։
Ադրբեջանի ԱԳ նախարարն ասել է, թե Ադրբեջանը կողմ է «սահմանների ցիվիլ որոշմանը՝ իրավական և պատմական փաստաթղթերի հիման վրա»։
Մայիսի 24-ին Հայաստանի և Ադրբեջանի միջպետական սահմանին տեղի է ունեցել ՀՀ փոխվարչապետ Մհեր Գրիգորյանի և Ադրբեջանի փոխվարչապետ Շահին Մուստաֆաևի առաջին հանդիպումը` Հայաստանի և Ադրբեջանի միջև սահմանազատման և սահմանային անվտանգության հարցերով հանձնաժողովների համատեղ աշխատանքի ձևաչափով։