ՌԴ ԱԳ նախարար Սերգեյ Լավրովը «Իզվեստիային» տված հարցազրույցում ասել է, որ իրավիճակը ՌԴ–Հայաստան հարաբերություններում լավատեսություն չի ներշնչում ՀՀ իշխանությունների դիրքորոշման պատճառով, որոնք գիտակցաբար փլուզում են ՌԴ հետ հարաբերությունները։

«Հայաստանում ես արդեն առիթ ունեցել եմ մեկնաբանելու ներկայիս իրավիճակը, այն, անշուշտ, լավատեսություն չի ներշնչում։ Հայաստանի ղեկավարությունը, միտումնավոր խեղաթյուրելով վերջին երեք-երեքուկես տարվա պատմությունը, գիտակցաբար տանում է Ռուսաստանի Դաշնության հետ հարաբերությունների փլուզման»,- ասել է նա։

Ըստ Լավրովի, Երևանի այս կուրսը դրսևորվում է Գյումրիի 102-րդ ռազմաբազայում ծառայող ռուս զինվորականների, սահմանապահների, ինչպես նաև ՀԱՊԿ-ին հեղինակազրկելու միտումով։

Անդրադառնալով ՀՀ–ում տեղակայված ԵՄ առաքելությանը՝ Լավրովն ասել է, որ այն համաձայնեցված չէր Ադրբեջանի հետ և այժմ այնտեղ են ուղարկվում զինվորականներ Նորվեգիայից, Կանադայից և ԱՄՆ-ից՝ «ԵՄ առաքելությունը վերածելով ՆԱՏՕ-ի առաքելության»:

Մարտի 27–ին Ադրբեջանի արտգործնախարարության խոսնակ Այhան Հաջիզադեն էր հայտարարել, թե Կանադայի անդամակցումը ՀՀ–ում տեղակայված ԵՄ առաքելությանը «այն դե ֆակտո ՆԱՏՕ-ի առաքելություն է հիշեցնում»:

ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ ապրիլի 5-ին Բրյուսելում նախատեսվող ՀՀ–ԵՄ–ԱՄՆ բարձր մակարդակի հանդիպումն անհանգստացնում է Մոսկվային, քանի որ «Վաշինգտոնն ու Բրյուսելը բացահայտ խոսում են դրա հակառուսական ուղղվածության մասին»։