Ադրբեջանի նախագահ Իլհամ Ալիևը հայտարարել է, որ Մոսկվան ու Բաքուն ևս մեկ մեծ նախագիծ են սկսում Հյուսիս-Հարավ միջանցքի շրջանակներում։ Նա այդ մասին ասել է Մոսկվայում, որտեղ ՌԴ նախագահ Վլադիմիր Պուտինի հետ մասնակցել է Բայկալ-ամուրյան մայրուղու վետերան շինարարների հետ հանդիպմանը։
«Ինչ վերաբերում է Հյուսիս–Հարավ տրանսպորտային միջանցքին, այսօր մենք Վլադիմիր Պուտինի հետ միասին մեկ անգամ ևս քննարկեցինք այդ հարցը։ Համապատասխան հանձնարարականներ են տրվել կառավարության անդամներին։ Վստահ եմ, մոտ ապագայում բոլոր հարցերը կհամաձայնեցվեն և մենք կսկսենք իրականացնել ևս մեկ մեծ նախագիծ»,-ասել է Ալիևը, հայտնում է Haqqin.az-ը։
Նա նշել է, որ Ադրբեջանի տարածքում կա երկաթգիծ, որը կապում է ադրբեջանա-ռուսական սահմանն Ադրբեջանի և Իրանի սահմանի հետ։
«Սակայն բեռնափոխադրողների կարիքները մեզ թելադրում են այս ճանապարհի նոր հատվածների կառուցման անհրաժեշտությունը, որպեսզի կարողանանք ավելացնել բեռնափոխադրումները դրա երկայնքով և դրանով ապահովենք եզակի տրանսպորտային ուղին Հյուսիսից դեպի Հնդկական օվկիանոս»,- նշել է Ալիևը։
