«Ցավալի է տեսնել, որ Հայաստանի նախագահն օտարերկրյա ոստիկանությանը խնդրում է պաշտպանել իրեն իր իսկ հայրենակիցներից»,- այսօր Երեւանում կայացած մամլո ասուլիսում ասել է Հայաստանի նախկին արտգործնախարար Ալեքսանդր Արզումանյանը` մեկնաբանելով ՀՀ նախագահ Սերժ Սարգսյանի համահայկական ուղեւորության ժամանակ հայկական համայնքների բողոքի ցույցերը հայ-թուրքական Արձանագրությունների առաջիկա ստորագրման դեմ: Նրա խոսքով, հայկական իշխանությունները պետք է Սփյուռքի կարծիքի հետ հաշվի նստեն Հայոց ցեղասպանության հարցում, սակայն հայկական համայնքների ներկայացուցիչներն իրավունք չունեն Հայաստանի նախագահից որեւէ գործողություներ պահանջել հայ-թուրքական հարաբերությունների կամ երկրների միջեւ սահմանի բացման հարցում, քանի որ այդ հարցը պետք է լուծի ինքը` Հայաստանը:

Արզումանյանը նաեւ նշել է, որ Սերժ Սարգսյանը կանի ամեն ինչ, որպեսզի չզրկվի նախագահական աթոռից` ներառյալ հայ-թուրքական Արձանագրությունների ստորագրումը, եթե անգամ դա հակասի պետության շահերին:

«Իր նախագահության առաջին իսկ օրվանից Սերժ Սարգսյանը սկսեց մի գործընթաց, որը բարենպաստ չի Հայաստանի համար»,- նշել է Արզումանյանը: Նա նաեւ վստահորեն հայտնել է, որ ՀՀ նախագահն իր պաշտոնը կլքի նախքան իր նախագահական ժամկետի ավարտը:

Մեկնաբանելով ՀՅ Դաշնակցության` ԱԳՆ ղեկավար Էդվարդ Նալբանդյանին ուղղված հրաժարական տալու պահանջը, Արզումանյանն ասել է, որ Նալբանդյանի փոխարեն կարող էր լինել ցանկացած այլ նախարար: «Նույն հաջողությամբ կարելի է պահանջել գյուղատնտեսության նախարարի հրաժարականը»,- նկատել է նա: